filipino,

Literary: Silid ng malulungkot na salita

2/14/2020 09:06:00 PM Media Center 0 Comments

Lumilipad-lipad lamang ang mga salitang malulungkot
Nagtatago sa mga pader ng mga linyang kailanman ay hindi magtutugma
Sa loob ng madilim na kwarto na puno ng nakapanlulumong salita
Ako'y matagal nang nanatili

Dahan-dahan, unti-unti
Kahit na nanginginig pa ang mga sugatan kong binti
Humahakbang palabas ng silid
Ginabayan ng nakabibighani mong ngiti

Ang daming masasayang salita
Na lumilipad-lipad lang sa paligid
Dumadapo sa aking balikat
Ang sarap palang magmahal

Mga mala-bahagharing pangako
Mga huni ng matatamis na salita
Mabubulaklak na mga pangarap
At ang pakiramdam na nasa itaas ng ulap

Ngunit biglaan na lamang
Umulan ng iyong pagpapasubali
Bumaha ng pagdududa
'Yung mga dating totoo ay unti-unting naging kasinungalingan

'Yung mga dahan-dahan ay naging biglaan
Bumilis na ang dating marahan
Natakpan na ng maiitim na ulap ang mga bahaghari
At pinunit ng kawalan ng iyong pakialam

Nawala na ang lumilipad-lipad na masasayang salita
Napalitan ito ng mga bulong ng malamig na hangin,
Biglaang nagdilim ang paligid
Salamat sa paghatid mo sa akin pabalik
Sa silid ng malulungkot na mga salita.