Buwan ng Wika at Kasaysayan, muling ipinagdiwang
Kaiba sa nagdaang dalawang taon, ngayong 2018 ay nagsanib muli ang Sangguniang Pangwika, Kilusang Araling Panlipunan, Departamento ng Sining ng Komunikasyon–Filipino, at Departamento ng Araling Panlipunan sa pangunguna sa pagdiriwang ng Buwan ng Wika at Kasaysayan sa University of the Philippines Integrated School (UPIS) mula Agosto 14 hanggang Setyembre 21.
Ayon sa Proklamasyon Blg. 1041 na nilagdaan noong 1997 ni dating Pangulong Fidel Ramos, dapat magsagawa ng taunang selebrasyon ng Buwan ng Wikang Pambansa tuwing Agosto. Pinagtibay ang proklamasyon dahil ang wika ay pangangailangan sa komunikasyon at kaunlaran ng bansa, at nakatalaga sa ating Saligang Batas ang pagpapahalaga sa ating katutubong wika.
Tema ng pagdiriwang ang “Kasaysayan at Wikang Filipino: Paghubog ng Kamalayan para sa Makataong Lipunan” na layuning palaganapin ang pagmulat, panawagan, at pagpapahalaga sa kasaysayan at wika tungo sa pagsiyasat at pag-aksyon sa mga kasalukuyang isyung panlipunan.
Nagkaroon ng samu’t saring gawain at patimpalak sa bawat grado.
Sa K-2, idinaos ang “Pistang Pinoy” na salusalo ng bawat seksyon sa paraan ng potluck.
Kinilala rin ng mga mag-aaral ang iba’t ibang salitang Filipino na bago para sa kanila sa “Parada ng mga Salitang Pinoy,” kung saan pumili ng isang estudyante kada seksyon na may pinakamagandang gawa na nametag sa Kinder, sash sa Grado 1, at headgear naman sa Grado 2.
Nanalo sa Kinder sina Jillian Simangan ng Jasmin, Aninaw Velasco ng Kamia, Travis Antonio ng Magnolia, at Jaime Obias ng Sampaguita. Sa Grado 1 naman ay sina Lucian Quinto ng Agila, Mayie Dela Paz ng Lawin, Chelzy Ofrancia ng Loro, at Frances Cablao ng Maya. At sa Grado 2, nagwagi sina Keisha Ong ng Atis, John Maramag ng Chico, Cian Casis ng Lansones, at Ma. Dañelle Mangundayao ng Mangga.
Kasabay nito, nagbahagi rin ang mga guro ng mga salitang Filipino bawat linggo para lumawak ang bokabularyo ng mga estudyante sa wikang pambansa.
 |
PARADA. Maayos na nakapila ang mga estudyante ng K-2 suot ang kanilang mga inihandang palamuti para sa parada. Photo Credit: Maria Ysrael Blas at Tina Roisin Linsangan |
Matapos ang
parada, isinagawa ang “Ang Galing ng Pinoy” na pagtatanghal ng ilang piling
mag-aaral ng musikang Pilipino matapos ang audition na kanilang sinalihan. Ang
mga nanalo sa Kinder ay sina Prince Daños ng Magnolia at Daniel Luna ng
Sampaguita. Sa Grado 1 ay sina Josel Apdian ng Agila at Sue Gianan ng Maya.
Sina Elin Lim, Christian Tamayo II, at isang grupo na binubuo nina Marteena
Darantinao, Javick Corpuz, at Arianni Vargas ang nagwagi mula sa 2-Chico, si
Mikhaella Mercurio ng 2-Lansones, at si Diane Reyes ng 2-Mangga.
Sa Grado 3-6,
nagsagawa ng “Kilos-Awit” ang Grado 3 na kanilang interpretasyon sa “Ako’y
Isang Pinoy” ni Florante na pinagwagian ng 3-Lawa. Umangat naman ang
4-Malunggay sa “Sayawit” ng Grado 4 na itinampok ang “Mapayapang Mundo” ni
Bayang Barrios. Sa Grado 5, nanalo ang 5-Samat sa “Dulawit” ng “Papel” ni Joey
Ayala. Kampeon naman sa pagtatanghal ng Grado 6 ng mga pista mula sa iba’t
ibang rehiyon ng Pilipinas ang 6-Ruby sa kanilang interpretasyon ng Panagbenga
ng Luzon.
 |
INDAK. Buong husay na ipinakita ng 6-Ruby ang kanilang presentasyon na Panagbenga Festival. Photo Credit: Ezra Bustamante |
Sa hayskul, nagwagi ang 7-Venus sa “Sabayang Pagbigkas” ng tulang “Wala Kang Karapatan” ni Ligaya Tiamson Rubin. Iginawad ang unang gantimpala sa “Saling-Awitan” ng Grado 8 sa 8-Honeybee na nagsalin sa Filipino ng “Man in the Mirror” ni Michael Jackson. Nanguna naman ang 9-Iron na inirepresenta ang Mindanao sa “Etnikong Tugtugin” ng Grado 9. At 10-Lauan naman ang kampeon sa “Sayawit” ng Grado 10.
 |
KAHANGA-HANGA. Buong liksing ipinamalas ng 9-Iron ang kanilang presentasyon ng “Singkil” mula sa Mindanao para sa Buwan ng Wika at Kasaysayan 2018. Photo Credit: Marco Sulla |
