Showing posts with label misteryosong lakambini. Show all posts

Literary: Pagpapasko sa Amin




Pagbibigay
Nandito na ang malaking biyaya ng Pasko!
Tuloy na tuloy na ang selebrasyong ito
Nakatanggap na ng bonus ang ama ko
Matutustusan na rin ang aming mga gusto

Pamimili
Mabibili na ang laruang robot na minimithi
Maibibigay na rin ang sapatos na hinihingi
Kumukutitap na presyo sa’ming mga mata
Bibili nang bibili hanggang mabutas ang bulsa

Pagbabakasyon
Sa pagdating ng mahabang bakasyon
Sa mall lang matatagpuan ang aming lokasyon
Kakain at gagastos sa kung saan-saan
Mahalaga lang naman’y kami’y masiyahan

 Panreregalo
Maghahanap ng panregalo ang aking ina
Ibibigay niya ‘to sa lahat ng kanyang kakilala
Bobonggahan ang bigay kung para sa pamilya
At mumurahin lang kung para sa iba

Pagsasama-sama
Mas masaya ang selebrasyon kung kumpleto
Kaya lahat ng kamag-anak namin ay imbitado
Maging ang mga hindi na namin kakilala
At mga ninong at ninang na matagal nang di nakita

Pagkita
Pasko na, asan na kaya sila?
Hala! Nagtago na naman yata
Tuwing may okasyon bigla na lang silang nawawala
Ang mga hihingan dapat namin ng regalo’t pera

Pagkakaisa
Ayun! Naroon lamang pala sila
Nagsisipag-inuman kasama ni ina’t ama
Brandy, Gin at Vodka ang kanilang mga hawak
Na agad-agad naman nilang tinutungga

Paggalang
Ngunit kailangan pa rin sa kanila’y magmano
Maging magalang at mag-“po” at “opo”
Sapagkat kailangan makakuha ng aginaldo
At tumakas agad pagkatanggap nito

Pagkain
Pumunta na lang kaming mga bata sa’ming mesa
Kasama ang kalaro kong si Alyas Taba
Lamon nang lamon ‘di man lang magtitira
Para sa ibang kumakalam din ang sikmura

Pagsasaya
Agad kaming napatingin sa bandang kanan
Naroon ang mga tiya at tiyuhing nagsasayawan
Isama pa ang nasa bidyoke’t nagkakantahan
Nakakabasag-tengang mga tugtugan!

Pag-aayos
‘Di rin pala nawala ang fashion show
Magagarang damit at mamahaling sapatos itinatampok
Patok na patok sa mga mata-pobreng tao
Nagpapayabangan ng kani-kanilang luho

Pangangaroling
“Saylent nayt, huli nayt” karoling namin
Sa malaki at magarbong bahay sa may amin
Agad lumabas ang katulong, sabay abot ng sampung piso
‘Di bale nang sintunado, nabigyan naman ng aginaldo

Pagdiriwang
Nariyan na naman ang patarpaulin ni Mayor
Na nanakawin lang naman ng mga tricycle drayber
‘Eto ang tradisyong nangyayari taun-taon
Ito ang pasko ng buhay sa bayan ko.

Pagpapasko
Natapos ang gabi na pagod na ang lahat
Lustay na ang salapi, ubos na ang enerhiya
Tapos na ang pabonggahan, tapos na ang saya
Ng mga taong nagdiwang sa panandaliang ligaya.

Literary: Ang Mamatay Nang Dahil Sa 'yo





Sa aking dugo at laman nananalaytay
Ang pagka-Pilipinong namana kina Inay at Itay
Pag-ibig sa bayang pinag-alayan ng kanilang buhay
Ang naging dahilan kung bakit sila’y sa akin nawalay.

Natanggap ko ang kanilang mga liham
Noong ako ay nasa edad pa lamang na siyam
Noon ay ‘di ko pa lubusang naiintindihan
Kung bakit kinailangan nila akong iwan.

Napakaaga para sa tulad kong musmos
Ang maging mag-isa at ituring na ulilang lubos
Ngunit buti’y nandyan ang aking lola at lolo
Na ang tuluyang suporta ay hindi naglaho.

Pinakain, inalagaan, binihisa't pinag-aral
Sinisigurong busog ako sa pagmamahal at pangaral
Hanggang sa makapagtapos, tinanong nila ang aking pangarap
Na kinatatakutan kong sabihin at sa kanila’y iharap.

“Gusto ko pong maging sundalo,” wika ko,
“Gusto kong sundan ang yapak ng mga magulang ko.”
Doon sila biglang umiyak, tumutol, at nagalit
Habang ibinubulalas ang tanong na “Bakit?”

“Gusto mo ba kaming iwanan tulad ng mga magulang mo?”
Sumbat ng aking naghihinagpis na Lolo.
“Mamamatay ka lang! Ayoko, mahal kong apo!”
Tangis ni Lola, sabay yakap sa aking braso.

Kahit nasasaktan, ako’y ngumiti, nagpasalamat sa kanila’t humayo,
“Estudyante pa lamang, sumumpa na ako sa bansang ito,
Aking ligaya na kapag may mang-aapi
Magsisilbi sa kanya mula ngayon hanggang dulo.

Literary: Pag-ibig ng Ina





Isang kang regalo kung maituturing
Sagot sa ’king dasal, sa aking mithiin
Na magkaroon ng masiglang supling
Na aalagaan at palalakihin

Ako ay talagang napuno ng saya
Nang marinig ko ang tunog ng iyong iyak
Tanda ko rin pala, una mong pagdilat
Na sa puso ko ay tunay na galak

Gabi-gabi’y puyat para mapatahan
Dugo ko at pawis ay aking puhunan
Para maipakita, ika’y iingatan
Hanggang sa mahimbing, ika’y sasamahan

Sa aking isipan ay buhay pa
Ang unang pagtungtong mo sa eskwela
Ayaw mong bumitaw, nais mong isama
Ang ‘yong minamahal na ina

Hindi ko alam kung dapat ba akong matuwa
Ang iyaking anak, nagmamakaawa
Ngunit narinig ang iyong pagtawa
Matapos maglaro na ikinasaya

Dati’y nasa baitang na elementarya,
Ngayo’y naging ganap na isang hayskul na
Natutong umalis at maglayaw bigla
Takas sa magulang, kasama ng iba.

Halos ikamatay ang ‘yong pagkawala
Hanap nang hanap, hindi ko makita
Lasing ka na pala, sa bahay ng iba
Ako’y naluha, ika’y nahanap na

Kinabukasan ay naging mahirap
Sagot mo sa tanong ay puro lang irap
Hiniling ko na sana ang kausap ko’y alak
Matigas mong tingin sa aki’y wumasak

Anak, ayoko lamang ikaw ay mawala
Mawalay sa akin at mapariwara
Gusto ko lamang na ika’y sumaya
Mabuting paraan, sayo’y ipakita

Sadyang kay bilis ng panahon at oras
Noo’y musmos lamang, ngayo’y isa nang dalaga
Talagang maganda at karapat-dapat
Sa ‘di kung sinu-sinong binata

Ako’y naging saksi sa unang pagbagsak
Una mong inibig, mundo mo’y winasak
Iniwang may luha, puso mo’y binasag
Masamang gawain, sa’yo pala’y hangad

Ikaw ay bumangon, naging masayahin
Sinusunod mo na ang alituntnin
Na itinuro ko nang iyong naisin
Na magbagong buhay at ako’y sundin

Ang buhay nati’y magkaugnay, magkabigkis
Ngiti mo at saya ay aking ligaya
Sa huling hininga, hinihiling ko na
Pakatandaan mo, pag-ibig ng ina.

Literary: Biyaheng Sawi






Accident Prone Area
Sa hindi inaasahang pagkakataon
Tayo’y nagtagpo na tila buhangin at alon
Nakuha ng isa’t isa ang atensyon
Tadhana yata sa atin ay umaayon

Road Narrows
Kinilala ko ang busilak mong puso
Inalam kung ang mga winiwika mo'y totoo
Nakaramdam ako ng saya, nerbyos at pagkalito
Dahil sa pagdating ng pag-ibig sa buhay ko

Lines Merging
Habang ipinagpapatuloy ang ating masayang paglalakbay
Marami tayong bagong nakasalamuha’t nakasabay
Inakala ko ngang ikaw na ay mawawalay
Ngunit ako’y nagkamali, ako’y iyong sinabayan at hinintay

Bumpy Road
May mga panahong ‘di tayo nagkakaintindihan
Natakot akong magkalamat ang ating pagsasamahan
Ngunit lahat ng iyon ay ating nalampasan
Pagkat naniwala tayong may ‘walang hanggan’

Zigzag
Nagsimulang dumami ang maliliit nating alitan
Bigla-bigla ka na lang kumakabig pakaliwa at umiiwas sa kanan
Ang kaligayahan ay napalitan ng kalungkutan
Ito na ang naging ugat ng ating pagsisiraan

Y-Intersection
May mga pangyayari talagang ‘di natin maiiwasan
Dumating na ang aking pinakakinatatakutan
Mga problema nati’y ‘di na masolusyunan
‘Di ko lubos maisip noon na hahantong tayo sa hiwalayan

U-turn
Nawa'y makabalik akong muli
Sa mga panahong nasisilayan ko ang iyong ngiti
Itatama ko ang lahat ng nagawa kong mali
Upang ang puso ko ay hindi maging sawi
Subscribe to: Posts (Atom)