Ang pag-ibig nati'y parang isang tula

Minsan ay may pagtutugma

Minsan nama’y wala

Ang pag-ibig nati'y parang isang kanta

Himig na puwede nating sabayan kahit tensyonado

Kaso nga lang ako ay sintunado

Ang pag-ibig nati'y parang isang mito

Puno ng mga diwata at mga bathala

Na gabi-gabi nating dinadasalan na sana tayo ang nakatadhana

Ang pag-ibig nati'y parang isang sonata

Ang bilang ay eksakto, bawat salita ay pili

‘Di tayo malaya, ‘di puwedeng magkamali

Ang pag-ibig nati'y parang isang dula

Nakatutok sa 'tin ang ilaw at sa atin ang buong entablado

Ngunit takot na ang pagmamahala'y matunghayan ng maraming tao

Ang pag-ibig nati'y parang pagsayaw ng balse

Umiindak sa magagandang mga kanta

Ngunit ang magkapares ni kailanma’y hindi naging tayong dal’wa

Ngunit higit sa lahat, pag-ibig nati'y parang isang nobela

'Di papayag na magtapos ang ating kuwento sa isang pahimakas

Umaasa na ang mga susunod na pahina'y

tungkol sa kung paanong dito sa mapait na realidad

hawak-kamay tayong tatakas

Ang tumbang preso ay parang pag-ibig

Ito ay isang paligsahan para sa mga matatapang at handang sumugal

Ang manlalaro ay dapat handang mahirapan at masaktan

Ngayon ang tanong sa sarili ay "Handa na ba uli akong maglaro ng tumbang preso?"

Handa na ba akong masaktan

Handa na ba akong ika'y protektahan

Handa na ba akong saluhin ang mga lumilipad na tsinelas para 'di ka matumba

At kung sakali mang ika'y matumba, handa na ba akong tulungan ka at muling itayo?

Handa na nga ba ako, o baka naman ako’y naglalaro na nang hindi ko namamalayan

Hindi ko alam kung bakit ako’y nasasaktan tuwing ika'y malungkot

Hindi ko alam kung bakit pinoprotektahn kita mula sa masasamang sinasabi nila

Hindi ko alam kung bakit lahat ng problema at sakit na dapat sa 'yo ay sinasalo ko

Hindi ko alam kung bakit tuwing ika'y natutumba itinatayo kita at binibigyan ng lakas ng loob

Hindi ko alam kung bakit ako sumusugal nang ganito

Hindi ko alam kung bakit handa akong masaktan para lang sa 'yo

Hindi ko alam kung bakit gusto kong lagi kang ligtas at magkasama tayo

Hindi ko alam kung bakit nilalaro ko na naman ang larong ilang beses na akong natalo

Pero alam ko at ipinapangako ko

Hindi ko hahayaang matapos itong laro nang hindi ako nananalo.