Showing posts with label ronnie bawa jr. Show all posts

Sports: UPIS BVT, tapos na sa UAAP Season 81


PAMILYA. Abot-tainga ang ngiti ng UPIS BVT kasama ng kanilang mga coach. Photo Credit: Louis Caguiat
Isang mainit na laban ang ipinamalas ng University of the Philippines Integrated School Boys Volleyball Team (UPIS BVT) sa kanilang huling laro para sa University Athletic Association of the Philippines (UAAP) Season 81 kontra sa Ateneo de Manila University (ADMU) BVT noong Nobyembre 25 sa Far Eastern University (FEU) Diliman Gym.

Unang set pa lamang ay nagpakitang-gilas na ang dalawang koponan. Naging gitgitan ang laban sa pagpapaulan ng spikes at blocks ng magkapatid na Ron at Miggy Castro ng UPIS at pagbabato ng mabigat na opensa nina Alexis Mendoza at Ronald Cordero ng ADMU. Inangkin ng UPIS ang 1st set, 26-24.

Nang dahil naman sa sunod-sunod na errors ng Junior Maroons, nabawi ng Blue Eaglets ang 2nd set sa dikit na iskor na 23-25.

Nagliyab ang Castro brothers sa sumunod na set ngunit hindi nagawang tapatan ang ADMU sa tambak na iskor na 14-25.

Nagpaulan sina Maroons Samuel Silvestre, Louis Caguiat, at Derick Urgena ng mga kills at blocks para pawiin ang nagbabagang apoy ng Eaglets at agawin ang 4th set, 26-24.

Hanggang sa final set, gitgitan pa rin ang laban sa pagitan ng dalawang koponan. Tensyonado ang mga manonood dahil kung magkataon na makuha ng UPIS ang final set, iyon ang magiging una’t huling panalo nila sa season na ito.

Ngunit hindi pumabor sa kanila ang huling set. Dahil sa sunod-sunod na errors, ADMU BVT ang nanaig sa dulo, 13-15, at sila ring nakapag-uwi ng panalo.

“Ang goal naman namin [ay] mag-improve at ma-execute ‘yung skills [na] nagawa naman namin. Siguro kinulang lang kami nang kaunti […] sa game namin pero nagawa namin ‘yung mga dapat naming gawin,” ani ni R. Castro.

Mensahe naman niya para sa mga susunod na batch, “Siyempre galingan nila next year at sipag lang nang sipag sa training at saka mag-recruit siguro kasi kailangan namin ng tao.”

Samantala, kasabay na nagtapos ng UPIS BVT ang UPIS Girls VT (GVT) noong Sabado ng linggong iyon, Nobyembre 24. Dumadagundong na spikes ang pinakawalan nina Alliah Omar at Trixie Badong kontra sa FEU GVT. Pero hindi ito naging sapat upang pigilan ang pag-arangkada ng kalaban sa pangunguna nina Alexis Miner at Lyan De Guzman. Bigo ang UPIS sa tatlong set: 22-25, 13-25, 13-25. //nina Geraldine Tingco, Julius Guevarra Jr., at Ronnie Bawa Jr. 
_____________________________________

Erratum:

Lubos pong humihingi ng paumanhin ang mga manunulat at editor sa unang pagkalathala ng artikulong ito na mali ang mga naitalang iskor. Narito po ang pagwawasto:
Unang Nailathala noong Disyembre 10, 2018 (Mali)
Pinal na Lathala ngayong Disyembre 19, 2018 (Tama)
UPIS BVT
Ateneo BVT
UPIS BVT
Ateneo BVT
Set 1
25
24
26
24
Set 2
24
25
23
25
Set 3
25
14
14
25
Set 4
24
25
26
24
Set 5
13
15
13
15

Sports: Girl Junior Tankers, 2nd runner-up ng UAAP Season 81


GILAS. Abot-tainga ang ngiti ng UPISVST matapos ang kompetisyon. Photo credit: Swim Philippines
Pumangatlo sa puntos na 314 sa overall ranking ng Junior Girls Division ang University of the Philippines Integrated School Varsity Swimming Team (UPISVST) sa University Athletic Association of the Philippines (UAAP) Season 81 nitong nakaraang Nobyembre 8 hanggang 11 sa Rizal Memorial Sports Complex, Maynila.

Pinangunahan ni Junior Tanker Zoe Hilario ang paglikom ng mga medalya’t puntos. Nakahakot siya ng limang gold mula sa limang solo events—200m medley, 200m backstroke, 100m backstroke, 400m medley, at 50m backstroke—at dalawang silver mula naman sa 200m freestyle at 100m freestyle. Siyamnapu’t siyam (99) na puntos o halos 1/3 ng kabuuang iskor ng koponan ang nagmula sa kaniya.

Hinirang naman bilang Rookie of the Year si Junior Tanker Alexa Natividad ng Grado 7 na nakapag-ambag ng limang puntos at nakapag-uwi ng isang gold mula sa 4x50m medley relay kasama sina Chelo Neri, Franz Joves, at Julie Anne Mapa; at bronze galing naman sa 400m medley relay kasama sina Chesca Joves, Mae Rodgers, at Mapa.

“Hindi ko in-expect na maging Rookie [of the Year] sa totoo lang. Makapag-finals lang at masaya na ako do’n,” panayam kay Natividad.

“Masaya na rin ang buong team dahil underdog ako sa finals at hawak pa rin ng UP ang pagiging Rookie [of the Year],” dugtong pa niya.

Matatandaang si Neri (Grado 8 na ngayon) ang itinanghal na Rookie of the Year noong nakaraang season.

Naging simple lamang ang ginawang paghahanda ng koponan upang hindi ma-pressure pagdating ng UAAP.

“Nag-train lang regularly and as much as possible hindi mag-absent sa training kahit maraming homeworks,” ani Hilario.

Ang nanguna sa overall ranking sa Girls Division ay ang De La Salle University Junior Green Tankers na nakakuha ng 398 puntos na sinundan ng University of Santo Tomas Junior Tiger Sharks na naka-319.

Kasamang lumaban ng Girl Junior Tankers ang Boy Junior Tankers na umabot hanggang sa finals ngunit hindi pinalad na makasungkit ng medalya.

Kasama rin ng Junior Tankers ang kanilang Senior Tankers na pumangalawa sa Women’s Division overall ranking, 352 puntos.

Narito ang listahan ng mga nakakuha ng medalya:

Franz Joves
Gold-        200m medley relay
Silver-      400m freestyle relay
Bronze-    400m freestyle relay
                 200m freestyle relay
                 50m backstroke

Chesca Joves
Bronze-     400m freestyle relay
                  200m freestyle relay
                  400m medley relay
                  200m backstroke
                  100m backstroke

Mae Rodgers
Bronze-     400m medley relay
                  200m freestyle relay

Alexa Natividad
Gold-        200 medley relay
Bronze-    400m medley relay

Jullie Anne Mapa
Gold-        200m medley relay
Bronze-    200m medley relay
                 400m freestyle relay
                 400m freestyle relay

Chelo Neri
Gold-        200m medley relay
Silver-      200m freestyle relay
Bronze-    200m breastroke
                 400m freestyle relay

Zoe Hilario
Gold-        400m individual medley
                 200m individual medley
                 200m backstroke
                 100m backstroke
                 50m backstroke
Silver-      200m freestyle
                 100m freestyle

Chloe Fabic
Bronze-     400m individual medley

Charlaine Esmero
Silver-     200m backstroke
                100m backstroke

Angela Torrico
Silver-      400m freestyle relay

Rikki Melencio
Silver-      400m freestyle relay

//ni Ronnie Bawa Jr. 

Sports: UPIS, sumabak sa Milo Little Olympics



LUSONG. Buong lakas na lumaban si Alonzo Cristobal sa kaniyang event noong Milo Little Olympics. Photo Credit: Marco Sulla

Pinatunayan ng mga manlalaro ng University of the Philippines Integrated School (UPIS) ang kanilang husay sa palakasan sa 31st Milo Little Olympics National Capital Region (NCR) Leg noong Agosto 25 at 26 sa Marikina Sports Center.

Humataw sa paglangoy si Junior Tanker Maria Consuelo Neri na humakot ng dalawang gold mula sa Girls 4x100m at 4x50m medley relay, isang silver mula sa Girls 100m breaststroke, at dalawang bronze sa Girls 200m freestyle at 200m breaststroke.

Kasama niyang nag-uwi ng sandamakmak na medalya ang swim team. Nakapag-ambag ng isang gold at tigalawang silver at bronze si Joshua Luc Sedurante. Parehong nakakuha ng tig-isang gold at tigalawang silver sina Keanne Nuevas at Rikki Melencio. Isang gold, dalawang silver, at isang bronze naman ang kay Alexa Natividad. Tigalawang gold naman ang nasungkit nina Julia Mapa, Franz Joves, at Angela Claire Torrico. Tig-isang gold at silver naman ang kina Polo Uera at Isabel Baclig. Dalawang silver ang nakuha ni Miguel Diaz. At isang gold ang naiuwi ni Mark Lazaro.

Nakapagkamit naman ng tig-iisang gold ang elementary students na sina Alyssa Sedurante, Lyka Monares, Aleah Halabaso, at Julia Halabaso. At tig-iisang silver naman ang nakuha nina Frances Halabaso at Sherina Abogado.

Samantala, sa track and field, nakasungkit si Junior Dashing Maroon Josh Sabido ng silver sa 5000m run. Isang bronze naman ang natamo ni Kobe Cuerdo sa 400m hurdles.

Lumahok din sina Roni Kessel at ang magkapatid na Alex at Rico Tercio para sa taekwondo ngunit nabigong makakuha ng medalya.

Kung susumahin, 40 ang naiuwing medalya ng UPIS sa dalawa sa tatlong isport na sinalihan nito.

“Hindi ako nakuntento sa aking paglangoy dahil hindi ko napaghanda[an] nang maayos ang nasabing paligsahan. Marami pang pag-eensayo ang kailangan dahil ang naging resulta ng aking langoy ay hindi uubra sa paparating na UAAP,” panayam kay gold medalist Nuevas.

Kahit na dalawa lamang ang nakapag-uwi ng medalya sa track and field, masaya si Sabido na marami sa kanila ang nakatalo sa personal best at doon pa lang ay panalo na raw sila.

Samantala, nagpahayag ng pagkadismaya si Kessel sa pagkatalo sa taekwondo.“Sa tingin ko, ang laro ko sa Milo ay hindi ang pinakamahusay ko. Hindi wasto ang pinili kong game plan.”

Ang Milo Little Olympics ay kasalukuyang kinapapalooban ng 15 isport. Taunang kompetisyon ito na bukas sa lahat ng mga mag-aaral sa elementarya at sekondarya sa buong bansa.

Sa Nobyembre, sasabak ang Junior Tankers at Junior Dashing Maroons sa University Athletic Association of the Philippines (UAAP) Season 81, habang pinaghahandaan naman ng taekwondo ang National Interschool Taekwondo Championship sa darating na Setyembre 29.//nina Ronnie Q. Bawa Jr., Yanna Reblando, Marco Sulla, at Geraldine Tingco

Opinion: Nakaka-trigger na artikulo para sa mga SJW


Photo Credit: Ronnie Bawa Jr., Cyrille Villanueva, at Dianne Santos


“Nigger!” “Fagger!” “Your mom’s gay!”

Iyan ay ilan lamang sa mga salitang ikinapipikon ng mga SJW at itinuturing nilang nakakainsulto.

Ang mga SJW o Social Justice Warrior ay mga indibidwal na ipinaglalaban ang hustisya at pagkakapantay-pantay para sa minorya at mayorya. Maaari ding maging SJW ang isang indibidwal na nabibilang sa mayorya at nakakaramdam ng simpatya para sa mga naaapi at walang boses. Nariyan si Gandhi na ipinagtanggol ang karapatan ng mga kapwa Indian mula sa mga kolonyalista, si Martin Luther King na nagsulong ng karapatang sibil ng mga kapwa niya black, at siyempre ang sarili nating pambansang bayani na si Dr. Jose Rizal na lumaban sa mapang-aping mananakop sa pamamagitan ng pagsulat.

Sa panahon ngayon na laganap na ang paggamit ng internet kung saan malayang nagpapahayag ang mga tao ng kanilang mga ideya at saloobin, naglipana rin ang mga SJW. Ngunit kumpara kina Gandhi, King, at Rizal noon, nagkaroon ng pagbabago sa pagtingin sa mga SJW ngayon na naglalabas ng kanilang mga mensahe at adbokasiya gamit ang kompyuter at gadyet.

Madalas, ang mga SJW ngayon ay ang tipo ng tao na magagalit sa isang meme ng dalawang garlic breads na may label na “If I had a garlic bread for every existing gender.” Bakit siya mapipikon sa meme ng dalawang garlic breads? Bakit siya mapipikon sa isang meme na ang layunin ay mampikon talaga?

Nirerepresenta ng dalawang garlic breads ang dalawang kasarian—ang lalaki at ang babae. Reaksyon ng mga SJW, bakit daw walang pangatlong garlic bread? O pang-apat? O panlima? Bakit daw walang ispektrum ng garlic bread? Masyado raw homophobic ang gumawa ng litrato!


 Freedom of Speech at Censorship

Sa kasalukuyan na napakalayang nakapagpapalitan ng impormasyon ang mga tao dahil sa teknolohiya, hindi nangangahulugan na basta-basta ka na lang dapat magsabi ng iyong mga naiisip at nararamdaman. Kailangang may sarili kang sensura o censorship sa bawat sasabihin mo, bawal ang nakaka-offend. ‘Yan ang lagi nating iisipin sa tuwing may ipo-post tayo o sasabihin sa internet.

At talaga namang nakabantay sa usaping iyan ang mga SJW. “Don’t say the N-word,” ‘ika nga nila. “2018 na, guys, bakit niyo pa rin sinasabi ang N-word? Napaka-racist naman.” Pero iyon na nga, 2018 na. Kasabay na nag-e-evolve ng tao ay ang kaniyang mga salita. Kung noong panahon ng pang-aalipin sa Africa, ang salitang nigga ay ginagamit para sa mga black at nangangahulugang mababang uri o ‘di kalebel ng mga puti,’ ngayon, ginagamit na ito ng mga nigga mismo bilang simple at pamilyar na bansag o pantawag sa malalapit na kaibigan at kapatid nila na hindi lang black, maging ibang lahi rin.

Ngayon, kung ang tingin pa rin ng mga SJW sa salitang nigga ay pagpapababa ng turing sa mga black, nasa lohika na nila ang mali at sila rin ang racist mismo. Walang isyu sa non-blacks na tinatawag na nigga ang mga black na kaibigan.

At kapag sila’y may nahanap na gawang panitikan man o sining, na makokonsidera nilang “offensive,” kanilang igigiit na tanggalin ito kasi nakakainsulto raw sa isang ispesipikong pangkat. Sa ganitong kaso, kahit na ang mismong essence ng sining at literatura ay pagiging subhetibo (subjective) nito o kung anuman ang itinakda ng artist o awtor, ikakatwiran nila na dahil sila ang mas may alam at sila raw ay ‘woke’ o mulat, dapat ang kanilang punto lang daw ang ituring na may kredibilidad. Kapag ikaw naman ay hindi sumang-ayon sa kanilang statement, imbes na ika’y pakinggan at magsagawa ng intellectual discourse, kadalasan ika’y pipintahan lang na salot. Isang halimbawa, gustong ipa-ban ng isang magulang sa mga paaralan sa Amerika ang librong “Adventures of Huckleberry Finn” ni Mark Twain. Ito raw kasi ay ‘racist’ dahil gumagamit ng mga termino na hindi na kaaya-aya ngayon. Ang Huckleberry Finn ay isinulat noong 1800s, na tumatalakay sa paglilibot ng isang palaboy at isang African slave at buhay nila sa Mississipi. Lagpas sa salita, dapat tingnan muna ang istorya at tema ng itinuturing na klasik na sa totoo lang ay bumabatikos sa rasismo, at ang awtor nitong si Mark Twain ay isang anti-racism advocate din noon.


Equality?

Nakakatawang isipin na isa sa malalaking problema sa mga SJW ay tinitingnan nila ang kanilang status bilang unique o maituturing na isang special snowflake na natatangi sa ibang mga tao dahil nga kabilang sila sa minorya at bunga nito, kailangan daw silang intindihin at bigyan ng pribilehiyo. Halimbawa, idadahilan ng isang babae na siya raw ay babae kaya dapat na pasingitin sa pagkahaba-habang pila. Para bang naghahanap ng diskriminasyon kung saan wala kadalasan.

Noong mga nakaraang taon, may isang post na kumalat sa internet: isang babae ang nagreklamong hindi man lang siya inalok ng upuan ng lalaking nakaupo gayong babae siya at dapat daw na maging gentleman ang lalaki.

Di ba’t maituturing na equality na rin mismo ang hindi pagpansin ng lalaki sa babae? Naupo ang lalaki doon dahil maaaring pagod siya sa maghapong trabaho. Hindi niya tiningnan ang babae bilang mahina na nangangailangang umupo. Tiningnan niya ito bilang kapantay o maaari ngang mas angat pa sa kaniya—siya na maituturing na mahina at kailangang umupo habang ang babae ay malakas at kayang tumayo.

Equality pa nga ba ang hanap ng babae? O pribilehiyo na makaupo dahil babae siya? Di ba mga persons with disability, nagdadalang-tao, o senior citizen lang dapat ang binibigyan ng ganoong pribilehiyo?

Ang iba namang SJW na feminista ay kapuna-puna rin ang pananaw sa usapin ng “chivalry” o pagmamagandang-loob ng kalalakihan sa kababaihan. Halimbawa, nagkasabay sa paglabas sa pinto ang isang lalaki at isang babae. Hahawakan ng lalaki ang pinto para maunang makadaan ang babae pero magagalit ang babae. Siya raw ay isang strong and independent woman na hindi nangangailangan ng tulong ng isang lalaki. Panghaharas daw ang ginagawa nitong pangmamaliit sa kaniya! Ngunit kung susuriin, taliwas na ito sa ipinaglalaban niyang “social justice.” Ang totoong feminista ay itinataguyod ang tunay na pagkakapantay-pantay na hindi nang-iinsulto at umuusig sa anumang kasarian.


 Double Standards

Kamakailan, may kakilala kaming bakla na nag-post tungkol sa nakita niyang guwapo na nasa isang pampublikong lugar. Sinabi niya na kinulit-kulit niya ito para mapansin siya; tinanong-tanong ng kung ano-ano para lang mapahaba ang usapan. Pero isang buwan bago ito, siya rin itong nag-share ng isang post tungkol sa “creepy” boys sa Facebook na kinukulit ang ibang mga babae—tanong nang tanong, mapahaba lang ang usapan—katulad na katulad ng ginawa niya roon sa poging lalaki na nakatagpo niya sa mall. Bakit nakikita ng mga SJW na creepy ang mga lalaking nangungulit ng mga babae kahit na sila ay ganoon din? Nagiging okey lang pag sila ang gumawa, at mali kapag iba.

Bakas din ang double standards sa paraan nila ng pagpili kung ano ang creepy at hindi creepy. Kapag guwapo ang nagbigay ng papuring, “ang ganda naman,” sweet itong lalaki. Pero kapag di kaguwapuhan ang nagbigay ng papuring ganoon, manyak ito. Bakit kailangang may diskriminasyon, na siyang nilalabanan nila, sa pagpili ng kung alin ang sweet o creepy?

Pero kung itatama mo sila sa mga kamalian nila, ikaw ang yari!

Nakakatakot magsalita laban sa kanila. Magugulat ka na lang, bibigyan ka na nila ng label: Manyak! Homophobe! Sexist! Nazi! White supremacist! Para sa kanila, ikaw at ang mga katulad mong mag-isip ang kontrabida sa mundo nila na dalawa lang ang puwedeng panigan: mamili ka kung kakampi ka sa kanila o kakalaban—walang pagitan.

Imbes na turuan ang mga kalaban, binububungangaan lang nila ang mga ito. Paano ba matututo ang kabilang panig kung walang palitan ng impormasyon at argumento sa pagitan nila?

Sa dami ng mabibigat na problemang kinahaharap ng ating lipunan tulad ng giyera, kagutuman, labis na kahirapan, at iba pa, mga problema pa ba nila ang dapat na unahin? Ganoong kababawan? Kailan pa kaya magma-mature itong mga SJW na parang bata kung mapikon?

Tandaan nila na hindi lang sa kanila umiikot ang mundo. Hindi lahat ng bagay ay nilikha para sa kanila at dapat na umaayon sa kanila. Di naman sa nagkukumpara, pero walang-wala sa dinaranas nilang “pang-aapi” ang mga pang-aapi na nilabanan ng mga naunang SJWs at ng mga taong nakakaranas ng tunay na diskriminasyon at pang-aabuso ng lipunan.//nina Ronnie Bawa Jr. at Cyrille Villanueva

Sports: UPIS Taekwondo Team, sumipa ng mga medalya


KAMPEON. Taas-kamay na tinanggap ni Rico Tercio, Jr. ang kaniyang gintong medalya sa kategoryang Kyorugi.
Photo credit: Roni Natalia Brianna Kessel


Nakapag-uwi ng pitong medalya ang mga manlalaro ng University of the Philippines Integrated School (UPIS) mula sa Quezon City New Face of the Year Taekwondo Championship na ginanap sa Expo Hall, Fisher Mall noong Abril 21.

Naging top scorer ng koponan ang magkapatid na Tercio na sina Rico mula sa 1-Loro (red belter) at Alex mula sa 6-Amethyst (brown belter) na nag-uwi ng kabuuang tatlong medalya. Isang gold ang ambag ni Rico na mula sa Kyorugi habang dalawang silver naman ang kay Alex mula sa Kyorugi at Poomsae.

Ayon kay R. Tercio, ikinasiya niyang manalo sa kompetisyon dahil pinaghirapan niya ang pag-eensayo lalo na ang pakikipag-sparring. Sa mga susunod na paligsahan, inaasam niyang makasungkit muli ng gintong medalya.

Nagtamo naman ng tig-iisang bronze ang mga yellow belter na sina Elijah John Dalet (3-Bukal), Andres Joaquin Lagmay (1-Agila), at Anthony Tercio (4-Bataw) mula sa Kyorugi. Isang bronze din ang ambag ni blue belter Logan Isabel Sampang (7-Mercury) mula naman sa Poomsae.

Tournament-style ang laro na nahahati sa dalawa: ang Kyorugi, free-style sparring, at ang Poomsae, serye ng mga porma ng tamang pagdepensa at pag-atake. 

Hindi lahat ng nasa team ay estudyante sa UPIS. Labindalawa lamang ang taga-UPIS habang siyam ang nagmula sa ibang mga paaralan na walang taekwondo team sa Quezon City. Siyam na medalya ang napanalunan ng mga miyembrong hindi estudyante sa UPIS—tig-apat na gold at silver, at isang bronze.

Ayon kay Roni Natalia Brianna Kessel (9-Xenon), team captain, balak ng koponan na sumali sa iba pang kompetisyon tulad ng University Athletic Association of the Philippines (UAAP) Juniors. Ngunit upang magawa iyon, kailangan pa nila ng mga bagong miyembro na handang makipagsabayan sa team.

Ang susunod nilang laban ay ang 2018 National New Face of the Year Taekwondo Championships na gaganapin sa Mayo 19 at 20 sa Rizal Memorial Sports Complex.

“Mas mahirap ito sapagkat Luzon, Visayas, at Mindanao na ang maglalaban-laban. Pipilitin namin at ibubuhos namin ang aming lahat ng makakaya upang makamit ang tagumpay sa pakikipaglaban,” ani Coach Brixtonn Busto. // nina Ronnie Bawa, Jr. at Geraldine Tingco

Sports: UPIS Fencing Team, nakipagsagupaan sa UAAP Season 80


KAHANGA-HANGA. Buong giting na nakikipagtuos ang miyembro ng UPIS Fencing Team na si Rad Pascual sa kalabang Ateneo de Manila High School. Photo credit: Raymund Creencia


Malungkot ngunit nakangiti pa ring tinanggap ng University of the Philippines Integrated School (UPIS) Fencing Team ang sunod-sunod na pagkatalo sa University Athletic Association of the Philippines (UAAP) Season 80 Junior Fencing Tournament na ginanap sa PhilSports Complex, Pasig City noong Pebrero 8 hanggang 11.

Nakipagtunggali sina Lorenzo Bautista at Raymund Creencia ng UPIS sa unang araw sa kategoryang individual epee. Agad na na-eliminate si L. Bautista sa poules, habang pumasok sa direct eliminations si Creencia. Ngunit nabigo siya sa kanyang unang duwelo kontra kay Joshua Dayro ng Far Eastern University (FEU) Diliman – FERN College sa iskor na 15-10.

Sa individual foil match noong Pebrero 9, sumabak si Rad Pascual ng UPIS pero nalaglag sa poules. Nakalusot naman si L. Bautista sa direct eliminations at napataob ang unang kaduwelo na si Darylle Lumahan ng FEU-FERN. Pero pinatumba siya ng kasunod na kalabang si Prince John Felipe ng University of the East (UE).

Pinilit muling makipagsabayan ng UPIS sa team epee match naman noong Pebrero 10 kontra sa Ateneo de Manila High School kahit na isa pa sa mga kalaban ay miyembro ng Philippine National Team, si Jian Bautista. Nakapagtala ng 11 puntos si L. Bautista, malaking porsyento sa kabuuang iskor ng koponan, ngunit kinalaunan ay inararo sila ng matitinding opensa ng Blue Eaglets.

Hindi sila nakahabol ng mga kasamang sina Pascual, Creencia, at Craig Aquino sa sunod-sunod at walang palyang pagpuntos ng katunggali. Sa huli, wagi ang Blue Eaglets, 45-16, tambak ang Junior Maroons.

Madilim ang laban noon para kay L. Bautista na nakaranas ng ilang problema sa kalagitnaan ng laro makaraang ilang ulit na hindi pumasa sa weapon standards check ang kanyang kagamitan.

Kinabukasan, sa team foil match, naunahan naman ni Marius Barcenas ng Junior Maroons ang kalabang FEU-FERN anchor na si Jordan Lee bago pa ito makabawi, 5-2. Mabilis namang sinalakay ni L. Bautista ang score board, 10-8, sa pamamagitan ng matutulin niyang opensa at depensa.

Nag-init din sina Pascual at Aldrien Arevalo upang iangat ang marka ng pangkat ngunit di naging sapat para ungusan ang kalaban. Bigo ang UPIS sa iskor na 45-23.

"Medyo frustrated ako kasi last year na namin ito at feeling ko I wasn't able to perform as well as I was supposed to. Feeling ko parang medyo na-let down ko ‘yung mga kasama ko, pero the best I can do is to look forward and [improve] myself," sabi ni Pascual.

Kahit na kulang sa suporta, sinikap pa rin ng Junior Maroons na makapag-uwi sana ng medalya para sa eskuwelahan. Naging masakit sa kalooban ng seniors na mula sa Grado 12 ng UPIS ang pagkatalo lalo’t huling taon na nila ito sa high school division.

Kasalukuyang binubuo ang grupo ng walong miyembro lamang na sina L. Bautista, Pascual, at Creencia ng Grado 12, sina Aquino, Francis Eloriaga, at Max Salvador ng Grado 11, si Barcenas ng Grado 9, at si Arevalo naman ng Grado 8 sa pamamatnubay ni Coach Igi Cui, dating miyembro ng University of the Philippines (UP) Fencing Team. Anim sa kanila ang nakipagduwelo sa season na ito ng UAAP.

Humihingi ng suporta sa lahat ang fencing team upang magkaroon ito ng sapat na miyembro at mga gamit sa pag-eensayo nang sa gayon ay makilala bilang lehitimong varsity team ng UPIS at makakuha ng mga benepisyo mula rito.//nina Ronnie Bawa Jr. at Julius Guevarra Jr.

Sports: Laban ng Bawat Atleta



Photo Credit: Jem Torrecampo

Naging matunog na isyu sa pagbubukas ng University Athletic Association of the Philippines (UAAP) Season 80 ang hindi pagpapahintulot na makapaglaro ang University of the Philippines Men’s Basketball Team (UPMBT) rookie, Rob Ricafort para sa Fighting Maroons ngayong season. Ayon sa UAAP Board of Trustees (BOT), hindi maaring maglaro ang 24-year-old rookie dahil nakasaad sa UAAP Rules na hanggang edad 25 lamang ang pinahihintulutang maglaro para sa kanilang eskwelahan.

Kahit na sa Enero pa siya tutuntong sa edad na 25 at may isang buwang pagitan ang kanyang kaarawan sa pagtatapos ng UAAP season 80, hindi pa rin siya pinayagang makapaglaro. Kaya’t nagmumukhang malabo ang ibinigay na rason ng UAAP BOT ukol sa isyung ito. May mga nagsasabing hinahaluan ng pulitika ang kompetisyon dahil sa hindi pagpanig ng UAAP BOT sa UP. Naungkat rin ang isyu ng pagkakalulong sa ipinagbabawal na gamot ni Ricafort. Naging isyu rin ang desisyon na hindi paglaruin si Ricafort dahil matatandaang pinayagan ng UAAP na makapaglaro si Jamil Sheriff ng University of Santo Tomas (UST) kahit na 10 araw ang pagitan ng kanyang kaarawan at ng pagtatapos ng season 79 noong nakaraang taon. Tila lumalabas na hindi naging patas sa pagbuo at pagbibigay ng desisyon ang UAAP BOT lalo pa’t inilabas lamang nila ang desisyong ito tungkol kay Ricafort ilang araw bago ang mismong laban ng UP sa UAAP season 80.

Nakisimpatya sa protesta ng UPMBT at ni Ricafort ang mga estudyante’t manlalaro mula sa iba’t ibang paaralan at ang mga tagasubaybay ng UAAP tulad nina Jimmy Alapag, at Keifer Ravena na nagpahayag ng kanilang pagkadismaya sa desisyon ng BOT.

Madalas at nagiging karaniwan na ang pagkakaroon ng mga isyu kaugnay ng mga alituntunin sa mga kompetisyon. Ngunit ang pagsunod rito ay isang mahalagang aspeto na dapat rin namang isabuhay ng bawat atleta. Kung hindi sumunod ang isang atleta sa patakarang itinakda, dapat siyang tumanggap ng karampatang parusa pero kung siya ay sumunod naman sa lahat ng proseso at patakarang kailangang niyang pagdaanan, bakit natin siya tatanggalan ng karapatang maglaro?

Para sa mga atleta, ang paglalaro para sa kanilang eskwelahan sa mga iginagalang na mga kompetisyon tulad ng UAAP ay isang malaking bagay. Dito nila naipapakita hindi lamang ang kanilang talento kundi pati na rin ang pagpupugay nila para sa kanilang mahal na unibersidad. Isa ring karangalan para sa kanila ang maibandila ang kulay ng kanilang eskwelahan at maipakita sa iba kung sino sila at ano ang kaya nilang gawin. Isang akto rin nang pagiging dakila ang pag-aalay ng bawat laban para sa pangalang nasa harap ng kanilang mga jersey bago ang pagpapakitang gilas para sa pangalang dala-dala nila sa likod ng kanilang mga damit. Kaya’t isang kasiyahan, karangalan, at karapatan para sa kanila ang makapaglaro sa mga kompetisyon.

Bukod pa rito, hindi mo maaring alisan ng karapatan at pangarap na maglaro ang isang atleta dahil sa mga personal na isyung kinaharap nito. Magkaibang karakter ang tinataglay ng mga atleta sa loob at labas ng kanilang sport kaya naman hindi dapat maging basehan ng karapatan ng isang manlalaro ang kanyang mga pansariling problema at isyung mga kinahaharap. Ang karapatang makapaglaro rin kasi ay maaring isa rin nilang paraan upang patunayan sa kanilang sarili kung anong klaseng tao at manlalaro sila. Sapagkat ang tingin ng isang manlalaro sa isport niya ay hindi lamang isport kundi isang paraan upang ipahayag ang kanilang sarili. Paraan din nila ito para makaahon sila sa dating pagkalugmok, sa kaso ni Ricafort, paraan niya ito upang makaahon mula sa mga pinagdaanang pagsubok sa buhay.

Para naman sa mga institusyong gaya ng UAAP, ang mahigpit na pagpapatupad ng mga alituntunin ay isang magandang gawain upang matuto ang bawat manlalaro sa pagsunod sa mga ito. Higit sa anu pa man, kailangan ding maging patas ang pag-iimplementa nito tulad ng nangyari kay Sheriff ng UST. Hindi maaring ang batas ay ipapataw lamang sa iilang manlalaro o teams pero may pinapanigang iba. Ang batas at mga alituntunin ay ginawa upang sundin ng buong sistema kaya marapat lamang na kung magiging istrikto ang institusyon sa iilang tao, dapat ay gawin rin nila ito sa iba.

Ang laban ng mga atletang ay higit pa sa mga laro. Higit pa ito sa pagpapagalingan sa iba’t ibang larangan. Isa itong laban ng karakter at pagkatao. Hindi ito kagaya ng pag-aaral sa eskwelahan na may libro na gagabay sa iyo. Sa mundo ng isport, ang pagkabigo ang nagiging gabay at ang bawat tagumpay ay ang nagiging insipirasyon. Kaya bakit natin tatanggalan ng karapatan ang isang atletang makapaglaro kung ang tanging hangad niya ay ang gawin ang gusto niya, matuto mula sa mga karanasan at tagumpay, at dalhin ang kulay ng kanyang paaralan? //nina Carlos Laderas at Ronnie Bawa Jr.
Subscribe to: Posts (Atom)