dimples,

Literary: Magkaiba Tayo

5/17/2017 08:30:00 PM Media Center 0 Comments

Noong una pa lang
Alam na nating sadyang tayo’y magkaiba
Sa pag-ibig-
Praktikal ka.
               Ayaw mo ng mga rosas
               Katwiran mo’y sayang ang pera,
               Pagkat di nakakain.

Romantiko ako.
               Mapupulang rosas ang pinipili para sa iyo
               Pagkat kadalisayan ng mga bulaklak
               Nakakahawig ng pag-ibig ko sa iyo

Realistiko ka
               Mas gusto mong uminom ng kape
               Iyong nagtatalo ang tamis at pait sa umaga
               At kapag mga huling patak na
               Nagtatalo na ang asim at pait
               Pagkat ang magmahal at magsama ay may tamis at kapaitan


Ideyalistiko ako
               Mas gusto kong uminom ng gatas
               Iyong matamis na inumin
               Walang pait, Walang asim
               At sa huling patak na
               Hindi nagtatalo ang asim at pait
               Pagkat ang tunay na nagmamahal
               Pinapangibabaw ang saya ng nagsasama
               Hindi alintana ang pait, ang asim
               Pagkat ang tamis ng pag-ibig ay sapat na

Ngunit sa lahat, may isang bagay tayong
Higit na ipinagkaiba :

Lumaban ako.
               Ipinaglaban kita.
               Mahal kita.
Sumuko ka.
               Iniwan mo ako.
               Wala nang pagmamahal ang katwiran mo

Pero kahit na ganoon,
Nakatatawang isipin na minahal kita.
Minahal nga pala kita.