filipino,

Literary: Alaala

5/12/2017 08:35:00 PM Media Center 0 Comments

Nandito na naman ako
Sa una nating pagkikita
Malamig ang panahon
Naaalala ko pa hanggang ngayon

Pinanood natin ang paglubog ng araw
At pag-akyat ng mga bituin
Sumayaw tayo sa ilalim ng buwan
Nagpadala sa simoy ng hangin

Nandito na naman ako
Sa dati nating pasyalan
Kung saan muntik ka nang mabangga
Dahil ako ang iyong tinitignan

Hinawakan mo aking kamay
Mahigpit na mahigpit
Ayaw mo akong pakawalan noon
Naaalala ko pa hanggang ngayon

Nandito na naman ako
Nakatayo sa dati nating tagpuan
Dahil lahat ng iyong sinabi
Ay ‘di ko magawang kalimutan

Nandito na naman ako
Puno ng takot, tumatakbo palayo
Tinapos mo lang nang ganoon
Naaalala ko pa hanggang ngayon

Alam kong matagal nang wala
At hindi na babalik ang dating hiwaga
Alam kong tapos na ang lahat
At wala na akong magagawa

Pero baka hindi lang tayo nagkaintindihan
Baka masyadong mabilis ang lahat
Baka mayroon pang pagkakataon
Umaasa pa rin ako hanggang ngayon

Hindi ko magawang kalimutan
Hindi ko magawang putulin ang mga alaala
Na nag-uugnay pa rin sa ating dalawa
Dahil hanggang ngayon, naaalala ko pa

Tinapos mo’ng lahat
Ibabalik na ang mga gamit, mga mensahe’y buburahin
Mag-isa na akong maglalakad
Sa ilalim ng mga bituin