filipino,

Literary: Isa hanggang labindalawa

10/21/2019 09:15:00 PM Media Center 0 Comments

Mga numerong sumisimbolo sa oras,
Minsa'y bumibilis,
Minsa'y bumabagal
Ngunit kahit anong mangyari
Nagpapahiwatig ito ng wakas.
Tumingin ka sa orasan,
Makikita mo ang mga numero mula isa hanggang labindalawa.
Hindi ka ba nababahala
Na may nawawalang
Oras na hindi nababalikan
Na sadyang lumilipas na lang?
Pagdating sa labindalawa tapos na ang isang araw
Ngunit wala ka pa ring nagagawa.
Mga numerong bumubulong...
"Hawak mo ba talaga ang buhay mo? Kontrolado mo ba ito?
O kami lang ang nagdidikta
Kung kailan ka hihinto, kung kailan ka magsisimula.
Higit sa lahat, kung kailan ka mawawala."
Tumatakbo ang oras, nakahahabol ka ba?
Kahit napapatid, tumatayo pa rin,
Dahil sa takot na hindi mo masabayan
Ang oras na maaari kang iwanan.
Pero ito na nga, dumating na nga ang panahong
Hindi mo na kinaya...
'Gaya ng orasan, para lang tayong binibilangan.
Isa, dalawa, tatlo hanggang labindalawa,
Mistulang nakaririnding babala.
Isa, dalawa, tatlo hanggang labindalawa,
Tapos na, may magagawa ka pa ba?