dreaMCometrue,

Literary (Submission): Umuulan na Naman

9/24/2015 09:29:00 PM Media Center 0 Comments

Umuulan na naman.
At sa bawat patak nito, naaalala ko
Ang bawat luhang tumulo sa mga mata mo.
Ang mga tawa mong halatang hindi naman totoo.
Noong isang gabi'y sa aki'y ikinuwento mo,
Kung paanong ang lalaking inibig mo
Ay dinurog ang busilak mong puso.

Umuulan na naman.
At sa bawat patak nito, naaalala ko
Kung paanong sa tuwing magkasama tayo,
Ang kislap lang ng mata mo ang napapansin ko
Sa tuwing kinikilig ka habang ikinukwento
Na noong nakaraan naglalakad kayo,
Bigla na lang niyang hinawakan ang mga kamay mo.

Umuulan na naman.
At sa bawat patak nito, naaalala ko
Ang bakas ng lungkot sa mga labi mo
Noong nalaman kong nag-away pala kayo
At kung paanong sobrang nanggigigil ako
Na aawayin ko na rin sana yung kasintahan mo,
Ngunit, pinigilan mo ako.

Umuulan na naman.
At sa bawat patak nito, ay may hinihiling ako.
Na sana, kahit papaano, ay mapansin mo.
Na kahit kaunti ay madama mo ang damdamin ko sa'yo.
Na sana, hindi naman siya ang pagmasdan mo, kundi ako.
Alam ko namang sa aki'y kaibigan lang ang tingin mo.
Pero, nais ko lang talaga na malaman mo.

Na kahit sobrang nasasaktan na ang puso ko,
Hindi kita iiwan, at palaging nandito lang ako.