beyondMC,

Literary: Totoo Ba Ito?

9/23/2016 09:09:00 PM Media Center 0 Comments

Sa pagkagat ng dilim, nagliliwanag ang buwan
At mga bituing nagkikindatan ang masisilayan
Sinabayan pa ng malamig na simoy ng hangin
Naghuhudyat na papalapit na ang pasko sa’tin.

Ikaw at ako nakahiga sa damuhan
Tanaw na tanaw ang mga ilaw sa kalangitan,
Sabay naghihintay ng paglabas ng bulalakaw
At nagbabakasaling sa langit ay matanaw.

Lumalalim na ang gabi
At hindi na ako makapagtimpi,
Ang iyong kamay ay aking hinawakan
Nang walang anumang pag-aalinlangan.

Tinawag ko ang iyong pangalan
Ika’y lumingon at ako’y tiningnan.
Naglakas-loob akong sabihin
Ang inilihim na damdamin.

Mga sunod na pangyayari’y di ko inasahan
Nagliwanag ang aking buong kapaligiran
Ako’y napapikit sa labis na kasilawan
Ang nakita ko’y di mapaniwalaan.

Katawan mo’y biglang lumutang na lamang
Ako’y nagitlaanan at nanlamig buong katawan.
Di ko inasahan na ikaw pala’y ganyan:
May pang-kalawakang katangian.