filipino,

Literary (Submission): Magpasawalang-hanggan

9/30/2019 08:51:00 PM Media Center 0 Comments

At binigkas ng isang boses na umabot sa lahat ng panig ng mundo,
Sigurado ka ba?
Bibigyan kita ng pagkakataong pumili.
Maniwala ka sa'kin,
Bibigyan kita ng pagkakataong pumili.
Pagdarasal, pagmamahal,
Kaluluwang maaliwalas
At maliligtas ka, aking pangako,
Buhay
mag-
pa-
sa-
wa-
lang-
hang-
gan.

Nirvana, Elysium, Vaikuntha,
Langit
Paraiso
Magpasawalang-hanggan.

Sigurado ka ba?
Mahal Kita; ako’y naniniwala.

Sigurado ka ba?
Sinabi Mong ako nama’y karapat-dapat.

Sigurado ka ba?

Kaisipang minsa'y dumaraan sa aking kamalayan
Natatakot sa paraisong balang-araw makasasanayan
Dahil bagamat walang ibang hinahangad ang isang tao kundi ito
Hindi ko alam kung ano ang aking pwesto sa walang katapusang paraiso.

Kaisipang isinasantabi sa bawat araw, bawat ngayon
Natatakot sa isang panahong ako'y hihinga nang walang nilalayon
Dahil sa kailaliman at sa kabila ng aking nagmamahal, naniniwala, at nagdarasal na puso,
Hindi pa ako sigurado kung kaya ng aking kaluluwang mabuhay nang walang dulo.