Binnie,

Literary: Rain Karne Nation

4/28/2021 06:03:00 PM Media Center 0 Comments

Nasa punto na ako ng buhay ko
Kung saan napapaisip kung bakit nga ba ako nasa mundong ito.
Habang papunta sa aking destinasyon,
ano nga ba ang aking naging kahapon?

Ako ba’y dating prinsipe sa isang kaharian?
Marangya ang pamumuhay at laging pinagsisilbihan.
Maaring ako’y naging isang matsing
dahil pareho naman ang aming tunog sa tuwing ako’y humahatsing.
Matching!

Dati ba akong surot na kasinlaki ng kulangot?
Sumisiksik sa bawat kulubot
Sumisipsip ng dugo kapag nababagot.
Maaaring ako ay dating ampalaya.
Laging nilalait, dahil ako raw ay pangit,
Kulubot na nga, ang lasa pa’y mapait.
Awit!

Sa susunod kong buhay, gusto ko na lamang maging isang artista tulad ni Liza!
Gusto kong maging isang morena na malaki ang kinikita
Sinusundan ng kamera kahit saan makita
O kaya naman ay puting rosas;
May amoy na humahalimuyak.
Kaya lang, nalalanta sa hindi inaasahang oras.

Dumating na ako sa aking destinasyon,
Sa lupa, ako ay ibabaon.
Dumilim na ang paligid, binalikan ang aking nakaraang panahon-
Bakit ko ba naitanong kung ano ako noon
Kung sa susunod na mangyayari’y wala naman itong koneksyon.
Bakit nga ba ako nabuhay sa mundong ito?
Isang katanungan na hindi pa nasasagot sa loob ng ilang daang siglo.