filipino,

Literary: Kung.

4/28/2021 06:19:00 PM Media Center 0 Comments

Kung nasa palad ko lang
Ang mga numero sa orasan,
Dadagdagan ko
Ang mga minuto
Nang ang pagod mo’y mabawasan.

Kung nasa palad ko lang
Ang lahat ng kalungkutan,
Dudurugin ko ito
At itatago mula sa iyo
Nang ‘di mo na muling maranasan.

Kung nasa palad ko lang
Ang mga bituin sa kalawakan,
Ireregalo ko
Ang mga ito sa iyo
Nang ang ngiti mo’y muling masilayan.

At kung nasa palad ko lang
Ang distansya sa’ting pagitan,
Buburahin ko ito
Nang masabi ko na sa’yo
Ang dalawang salitang sa’yo lamang nakalaan.

Ngunit wala sa palad ko
Ang ating kapalaran.
At alam kong sa dulo
Ng ating kwento
Walang maligayang katapusan.

At wala sa palad ko
Ang kinabukasan.
Hindi ko mababago
Ang kalagayan ng mundo
At ang distansya sa’ting pagitan.

Ngunit kung nasa sa palad ko lang
Ang kasalukuyan,
Babaliktarin ko
Ang ikot ng mundo
At ang hulma ng kasaysayan.

Dahil kung nasa palad ko lang
Ang nakaraan,
Babawiin ko
Ang bawat segundo
Na hindi ko na mababalikan.

At kung nasa palad ko lang
Ang kamay ng orasan,
Uulit-ulitin ko
Ang huling mga minuto
Bago kita hinayaang lumisan.