filipino,
Literary: Saling Kitkit
Ang sayang tumakbo
Lalo na at ikaw ang naghahabol
Pero kahit tumakbo ako papalapit sa ’yo
Iba pa rin ang hinahabol at hahabulin mo
Ang sayang magtago
Lalo na’t ikaw ang naghahanap
Ngunit kahit magpakita ako sa iyo mula sa pinagtataguan ko
Hindi naman ako ang hinahanap mo
Ang sayang magpadausdos sa padulasan
Lalo na’t nakikita kong ikaw ang nag-aabang
Pero kahit anong dulas pa ang gawin ko
Sa iba nakalaan ang mga bisig mong magsasalo
Ang sayang maglaro
Lalo na at ikaw ang kasama ko sa kinahiligan kong libangan
Pero sabi mo hindi naman talaga ako kasali
Dahil ang totoo, saling-kitkit lang ako
0 comments: