filipino,

Literary (Submission): Monthsary

2/25/2019 08:28:00 PM Media Center 0 Comments




Ang iyong mga mata na sa aking paningin ay pumukaw
At sila ring dahilan kung bakit sa titig mo ako’y natutunaw,
Hinding-hindi ko ipagpapalit kahit sa matang bughaw
Mga matang nais kong makita sa bawat araw

Ang iyong mukha na ubod ng ganda ay kay sarap tingnan
At minsan ay hindi ko maiwasang ito’y aking matitigan
Kahit minsan, sa malayo ko lang ito nasusulyapan,
Ay nakapaghahatid na sa akin ng lubos na kasiyahan

Tatlong buwan na rin ang lumipas simula noong ako’y sagutin
At tila ba kay bilis ng panahon na gusto ko itong patigilin
Ang mga oras na tayo’y magkapiling ay aking gustong sulitin
Mananatili tayong masaya dahil ako’y sayo at ika’y akin

Sa bawat pagsapit ng umaga, sa bawat pagmulat ng mga mata,
Kasiyahan ang tangi nadarama dahil alam kong muli kang makikita
Ako’y nasasabik na muli kang makasama na para bang isang bata
Di kayang tumbasan at mabigyang kahulugan ng kahit anong salita

Ikaw lamang ang nakapagbigay sa akin ng saya na hindi maipaliwanag
Patawad kung minsan ay hindi ko maiparanas sa’yo at maipahayag,
Patawad kung minsan kang napag-aalala at aking nababagabag
Wag kang mangamba, para sa ating dalawa, ako’y magiging matatag

Ang magmahalan tayo habang-buhay ay ang siyang aking pangarap
Aking napagtanto na tapos na ang matagal na paghahanap
Sa iyo naranasan ang kaginhawaan matapos ang mga paghihirap
At handa pang harapin ang mga pagsubok sa ating hinaharap

You Might Also Like

0 comments: