filipino,

Literary (Submission): Ayaw kong lumipad

9/25/2018 09:03:00 PM Media Center 0 Comments

Masaya sanang lumipad
Kung magkakatotoo ito’t kakayanin
Sapagkat malaki ang biyayang hinahain nito
Para sa mga taong mapangarapin

Ang paniniwalang lalaya tayo sa langit
Ay tiyak namang nakahuhumaling
At nakamumulat sa bagong pananaw
Para sa mga taong tulad natin

Ngunit parang hindi rin naman ganito talaga
Lalo na’t mahirap maganap ang hindi maaari
At kung tunay namang makalilipad tayo
Ang masasabi kong pagkaunawa ko rito ay naiiba

Masyado kang mapalalayo nito
Makalilimutan mo ang iyong mundo
Hanggang sa punto na ika’y kaiinisan
Ng mga taong iniwan mo

Akala mo’y mabuti ang lagay sa itaas
Pero hindi pangmatagalan ito
Saglit ka lamang makalilipad doon
At mahuhulog muli sa katotohanan mo

Masarap sa pakiramdam ang muling pagkaka-angat
Ngunit masakit din sa dibdib kung ito’y matatapos
Kaloob ang magkaroon ng ginhawa sa buhay
Subalit sumpa rin ito kung alam mo ang magiging kahihinatnan

Walang masama sa paniniguro
Lalo na kung hindi lahat ng tao'y handang masaktan
Nang dahil sa kakulangan ng pagsasaalang-alang
Sa mga bagay na madaling mabalewala

Mainam na sa akin ang hindi makalipad
Sapagkat masasayang lamang ang panahon kung dito gugugulin
Sa madaling salita ay ayaw kong lumipad
Ngunit nasa iyo kung maniniwala ka sa taong lutang lamang ang isip